ဦးစီးအရာရှိစားပွဲတွင်
“ဘာကွ.... ပြန်ပြောစမ်း... ”
“ကျွန်တော်တို့ ဆန္ဒပြချင်လို့ပါ... ဆရာ”
“ဘယ်မှာလည်း လျှောက်လွှာ.. ... ပြစမ်းပါဦး..။”
“လျှောက်လွှာတင်ရမှာလား... ဆရာ”
“အာ .. ဘယ်လိုလူတွေလည်း လျှောက်လွှာမတင်ပဲ ခင်ဗျားတို့ကို ဘယ်သူခွင့်ပြုပေးမှာလည်း.. ”
“ဒီမှာသေချာနားထောင်..
အခု ခင်ဗျားတို့ ၀င်လာတဲ့ ရုံးပေါက်ရဲ့ ဘယ်ဘက်အခြမ်းမှာ စာရေးမတစ်ယောက်ရှိတယ်
သူဆီမှာ လျှောက်လွှာဝယ် ပြီးရင်... သူ့အနောက်က လက်ထောက်ကြီးကြပ်ရေးမှုးဆီမှာ
လျှောက်လွှာဖြည့်ပြီး ... စိစစ်ခိုင်း.. ပြီးရင် ကြီးကြပ်ရေးမှုးဆီမှာ စာအ၀င် မှတ်ပုံတင်စာရင်းသွင်း
အဲဒါအားလုံးပြီးရင် အဲဒီလျှောက်လွှာကိုယူပြီး ကျုပ်ဆီ ပြန်လာခဲ့.... ကြားလား သေချာမှတ်သွားဦးနော် ”
“ဟုတ်ကဲ့ ကျေးဇူးပါဆရာ”
“ ဟေ့ဟေ့ နေဦး.. နေဦး..
ဒီမှာ ကျုပ်ခုဏ စကားပြောမှား သွားလို့.. ဒီရုံးမှာ လျှောက်လွှာကို ရောင်းမစားဘူးနော်...
အေး ဒါပေမယ့် လျှောက်လွှာဆိုတာ အလကားရတဲ့ ပစ္စည်းလည်း မဟုတ်ဘူး ... ကိုယ်ဘာသာ နားလည်မှုရှိပါ..။”
စာရေးမစားပွဲတွင်
“အစ်မလေး လျှောက်လွှာတစ်စောင်လောက်”
“ဒီမှာ နည်းလမ်းနှစ်ခု ရှိတယ်.... လျှောက်လွှာကို မရောင်းဘူး ဒါပေမယ့် လျှောက်လွှာတွေက
အလကားရတာ မဟုတ်တော့ လျှောက်လွှာ တစ်စောင် လိုချင်ရင် မိတ္တူ အစောင်ငါးဆယ် ကူးပေးမလား
စေတနာ အလျှောက် ငွေကြေးထည့်ဝင်မလား နည်းလမ်းနှစ်ခုရှိတယ် ... ကြိုက်တဲ့ တစ်ခုရွေးပါရှင်.. ”
“ဟာ ရပါတယ်အစ်မ.. ကျွန်တော်တို့ စေတနာထက်သန်ပါတယ်”
လက်ထောက်ကြီးကြပ်ရေးမှုးစားပွဲတွင်
“ငါ့မောင်တို့က ဘာလုပ်မလို့လည်း ... ”
“ဆန္ဒပြမလို့ပါ.. ”
“အော်အေးအေး... ဒီနေရာမှာ အသက် အမည် နေရပ်လိပ်စာ မှတ်ပုံတင်နံပါတ် ပါတ်စပို့နံပါတ် ကိုယ်ရေးရာဇ၀င်အကျယ် ... အခုဦးဆောင်တဲ့လူ သုံးယောက်လုံး အဲဒီအတိုင်း အကုန်ဖြည့်ရမယ်...
ဟုတ်ပြီ ဒီနေရာမှာ ဓါတ်ပုံကပ် ... ဟိုဘက်နေရာလေးမှာ လက်မှတ်ထိုး... ။ ပြစ်မှုကင်းရှင်းကြောင်း ထောက်ခံစာကို အနောက်ဘက်မှာတွဲ ... အကျင့်စာရိတ္တကောင်းကြောင်း ထောက်ခံစာကို အလယ်မှာ ညှပ် ...ဟုတ်ပြီ ”
“ကဲငါ့မောင်တို့ ပြီးရင် ကြီးကြပ်ရေမှုး စာပွဲမှာ စာဝင်သွားလုပ်လိုက်နော်... ”
“အစ်မတို့က တော့ အခက်အခဲ ရှိတဲ့လူအချင်းချင်း နားလည်စာနာပါတယ်.. မောင်လေးတို့လည်း အများကောင်းဖို့ လုပ်နေတဲ့လူတွေမဟုတ်လား နားလည်မှု ရှိမှာပေါ့နော်...။ ”
“ဗျာ ဟုတ်ကဲ့... ကျွန်တော်တို့ နားလည်တတ်ပါတယ်.. ”
ကြီးကြပ်ရေးမှုး
“ပြော ဘာကိစ္စလည်း .. ”
“ကျွန်တော်တို့ လျှောက်လွှာလေး စာဝင်ထည့်ပေးပါ... ”
“ဟာ ... ခင်ဗျားတို့ က ဒီအချိန်မှဗျာ.. ကျွန်တော်က လျှောက်လွှာ စာအ၀င်ကို
ဆယ်နာရီခွဲအထိပဲ လက်ခံတာ.. အခု ဦးစီးကခေါ်လို့ အစည်းအဝေးမှာ လက်ဖက်ရည်သွားသောက်ရဦးမယ်
မနက်ဖြန်မှာ လာခဲ့တော့ဗျာ... ”
“မလုပ်ပါနဲ့ ဆရာရယ် ကျွန်တော်တို့ မနက်ဖြန်ဆို မဖြစ်လို့ပါ ကိစ္စကလည်း အရေးကြီးလို့... ကျွန်တော်တို့
သိတတ်မှာပါဆရာရယ်...။ ”
“တော်ရုံတန်ရုံ သိတတ်တာနဲ့တော့ အလုပ်မဖြစ်ဘူးဗျာ သေသေချာချာ သဘောပေါက်သိတတ်မှထိရောက်မှာ ”
“ရပါတယ်ဆရာရယ် ကျွန်တော်တို့ နက်နက်ရှိုင်းရှိုင်း သိတတ်မှာပါ... ”
“အဲဒါဆိုလည်း ခင်ဗျားတို့မို့ ကျွန်တော်လုပ်ပေးလိုက်မှာ...။”
ဦးစီးအရာရှိ
“ဘာကိစ္စလည်း ”
“ခုဏတုန်းက ကိစ္စပဲ... ”
“အာ ဒီလူတွေခက်ပြီ.. ခုဏတုန်းက ကိစ္စတွေက အများကြီးပဲ...
ကျပ်အခုတင် အပေါ့အလေးသွားပြီးပြန်လာတာ အရင်က ကိစ္စတွေ အကုန်မှတ်မိနေစရာ မလိုဘူး”
“ဟို .. မဟုတ်ပါဘူးဆရာရယ်..ကျွန်တော်တို့ ဆန္ဒပြဖို့ ခုဏလာပြောတဲ့ လူတွေပါ..
အခုလျှောက်လွှာတင်မလို့... ”
“အဲဒါ... ရှင်းရှင်းလင်းလင်းပြောပါလား
ဒီလောက်အလုပ်ရှုပ်တဲ့ ကြားက ခင်ဗျားတို့ အလုပ်မရှိအလုပ်ရှာ ဆန္ဒပြချင်တဲ့ လူတွေကတစ်မျိုးပဲ
ပြော... ဘာကြောင့် ဆန္ဒပြမှာလည်း... ”
“အဲဒီ... အလုပ်မရှိတဲ့ အကြောင်းကိုပဲ ဆန္ဒပြမှာပါ.. ဆရာ... ”
“ဘာ.....
ခင်ဗျားတို့ကို နိုင်ငံတော်က အလုပ်မရှိလို့ ဆိုပြီး လူမှုဖူလုံရေး ရံပုံငွေပေးထားတယ်
ခင်ဗျားတို့က အဲဒီပိုက်ဆံနဲ့ စားသောက်နေပြီး ဗိုက်ဝတော့ ဆန္ဒပြဖို့ စဉ်းစားတယ်...
ခင်ဗျားတို့ ကျေးဇူးကန်းရာ မရောက်ဘူးလား... ”
“အဲဒီလူမှုဖူလုံရေး ရံပုံငွေက ဆေးလိပ်ကွမ်းယာဖိုးလောက်ပဲ ရလိုပါဆရာ.. ”
“ဘာကွ.. အဲဒါနဲ့ ထောက်ပံ့စရိတ်ပိုလိုချင်တယ်ပေါ့.. လူဆိုတာ ရောင့်ရဲတတ်ရတဲ့ဗျ
ကွမ်းယာကျွေးတဲ့လက်ကို ပြန်မကိုက်ရဘူး... ”
“ဟာ မဟုတ်ပါဘူးဆရာ ကျွန်တော်တို့ ဆန္ဒပြမှာ အလုပ်မရှိလို့ပါ..
လူမှုဖူလုံရေး ရံပုံငွေကလည်း လုံလောက်ပါတယ်.. ဒါပေမယ့် ကျွန်တော်တို့ ၀န်ထုတ်ဝန်ပိုးကို
နိုင်ငံတော် ကို မထမ်းစေချင်ဘူး ... ကျွန်တော်တို့လည်း အခွန်ထမ်းပြီး နိုင်ငံတော်ကို ပြန်ကူညီချင်လို့ပါ”
“အဲဒါဆိုလည်း ပြီးရော... လျှောက်လွှာထားခဲ့လိုက်
နောက်ခြောက်လနေရင် ပြန်လာခဲ့... ”
“ဗျာ... ဆရာ
ကျွန်တော်တို့ အလုပ်မရှိတာ နောက်ခြောက်လနေမှ ဆန္ဒပြရမယ်... ”
“ဒါ ... ဒီမိုကရေစီနိုင်ငံဗျ ဥပဒေအတိုင်း လုပ်ထုံးလုပ်နည်းအတိုင်း သွားနေတာ
ခင်ဗျားတို့ရှေ့မှာ လျှောက်လွှာပေါင်း ရှစ်ရာကျော်ရှိတယ် အဲဒါကို အစဉ်လိုက်ခွင့်ပြုပေးနေရတာ ...
ကျုပ်တို့မှာ အကုန်လုံး သေချာ စိစစ်နေရသေးတာ... ခင်ဗျားတို့က ဆန္ဒပြရပြီးရော လုပ်ချင်လို့ရမလားဗျ
အေး ... မြန်ချင်ရင်တော့ ကိုယ့်ဘာသာ နည်းလမ်းရှာလုပ်... အရှေ့က စတိုးဆိုင်မှာ တော့ ဆန္ဒပြခွင့်ပါမစ် တွေရောင်းတယ် ကြားဖူးတယ် ... ကျုပ်တော့ သေချာမသိဘူး ကိုယ့်ဟာကိုယ်သာ စုံစမ်းတော့ဗျာ... ကျုပ်စားပွဲပေါ်မှာတော့ ... ဥပဒေအတိုင်းပဲ သွားတာ...
ကဲခင်ဗျားတို့ ကိစ္စပြီးရင်သွားတော့ဗျာ...
ဘယ်လို လူရှုပ်တွေမှန်းမသိဘူး .. အလုပ်မရှိတာကို ဆန္ဒပြမလို့တဲ့ ကြားမကြားဖူးပေါင်”
အောင်ပိုင်စိုး