Kind with Heart

သာအေးတစ်ယောက် အမိမြေနဲ့ အဝေးတစ်နေရာမှာ အလွန်အမင်း စန်းထ အောင်မြင်နေလေသည်။ တစ်ရွာပြောင်း၍ သူကောင်း ဖြစ်သည့် အထဲမှာ သာအေးပါသည်။ မအောင်မြင်ခံနိုင်ရိုးလား။ လူအတော် များများ၏ ကံကောင်းခြင်းများအား သူတစ်ယောက်တည်း ကံထရိုက် ဆွဲထားသလား အောက်မေ့ရအောင် ကံကောင်းခြင်း လက်ဆောင်များက သာအေးဆီ တဖွဲဖွဲ တသဲသဲ ၀င်လာမစဲ ဖြစ်နေသည်။

သာအေးဆီ အများဆုံးရောက်လာရတာကတော့ ငွေပဲဖြစ်သည်။ ဘယ်က ဘယ်လိုရသည် မမေးနဲ့။ ဘယ်လိုလုပ်လိုက်သည် မမေးနဲ့။ ငွေတွေ သောက်မြင်ကတ်လောက်အောင် သာအေးဆီ ၀င်နေသည်။ ဘဏ်တွေဆို သာအေးကို အတော်ပင် အမြင်ကတ်လေသည်။ သာအေးကလည်း သာအေး။ ရသမျှသော ငွေတွေကို ထားစရာမရှိသဖြင့် ဘဏ်သွားသွား အပ်ထားရာမှ ဘဏ်တွေက သာအေး၏ စုငွေများအတွက် အတိုးချည်း နင့်နေအောင် ပေးနေရသည်။ ကြာတော့လည်း သာအေးအပေါ် အတော်ပင် အမြင်ကတ် လာကြလေသည်။ ဘယ်သူတွေ အမြင်ကတ်ကတ် သာအေး၏ ဘဏ်စာရင်းတွင် ဒေါ်လာငွေများကား တိုးပွားမြဲ တိုးပွားဆဲ။

ယခုမျှလောက်ဆိုလျှင် စာဖတ်သူတို့ သဘောပေါက်လောက်ပြီ။ သာအေးဆိုသည့် ကောင်သည် ငွေပေါများနေသည် ငွေပေါလောကောင်ကြီးဖြစ်လေ၏။

ဗျိုး … ကိုသာအေးကြီး … လိုက်မလားဗျာ … ကောင်မလေးတွေကို ဓာတ်ပုံသွားရိုက်မလို့။

ဟေ … ဓာတ်ပုံရိုက်ပြီး ဘာလုပ်မလို့လဲကွ … သူတို့က လိုင်စင်လျှောက်ဖို့လား … စီဗွီဖောင်မှာ ကပ်ဖို့လား။ ကြည့် … ဓာတ်ပုံအရိုက်ခံခြင်းကိစ္စကို ထိုမျှလောက်သာ အသုံးဝင်သည်ဟု သိထားသော အနှီသာအေးဖြစ်ပေသည်။

ဟာဗျာ ဘယ်ကလာ ကိုသာအေးကြီးကလည်း … အခု သွားရိုက်မှာက အလန်းလေးတွေဗျ။ ကောင်မလေးတွေက ရေကူးဝတ်စုံလေးတွေနဲ့ လိုက်ခဲ့ပါဗျ ပျော်ဖို့ကောင်းပါတယ်။

ဒီလိုနဲ့ ရေကူးဝတ်စုံအသံကြားသော ထိုသာအေးတစ်ယောက် အတော်ပင် ထကြွသွားလေသည်။ သူတစ်ခါမှ မမြင်ဖူးသေး။ ဒါပေမယ့်လည်း ဟန်ကိုယ်ဖို့ဆိုသော စကားရှိသည် မဟုတ်ပါလား။

ခွေးကောင်လေးတွေ … သွားကဲကြမလို့ပေါ့လေ … အေးအေး မင်းတို့မှာ ပစ္စည်းပစ္စယတွေလည်း တပုံတပင်နဲ့ လူကလည်းများတယ်ဆိုတော့ ငါကိုယ်တိုင်ပဲ ကားမောင်းပြီး လိုက်ပို့ပါ့မယ်လေ။ ငါလည်း အတွေ့အကြုံ အသစ်တစ်ခုတိုးတာပေါ့။

ဟဲဟဲ လူကြီးက မသိရင်ခက်မယ် … ဘာပဲပြောပြော နောက်ဆုံးပေါ် ပေါ်ရှေး အမိုးပွင့်ကားကလေးနှင့် လာသည်ဟူသော ဂုဏ်ပုဒ်ကပင် အတော်လေးမြောက်ချင်စရာမို့ ထိုဓာတ်ပုံဆရာပေါက်စကလေး နှစ်ယောက် ကိုသာအေးနှင့်အတူ … ကမ်းခြေသို့ ချီတက်ခဲ့ကြသည်။

ဟိုင်း … ဟယ်လို … ဒါက ကိုသာအေးဆိုတာပေါ့ ဟိုင်းဘော့စ်လေ … အရွယ်တော် တစ်ဆိတ်ဟိုင်းနေပြီမို့ ကွယ်ရာမှာ ဟိုင်းဘော့စ်လို့ ခေါ်ခံရသည်ကို သိသဖြင့် အောင့်သက်သက်ဖြစ်သွားသော်လည်း ချစ်စရာမဒီလေးများက လက်ကမ်းပေးနေပြီမို့ သာအေးတစ်ယောက် လက်ဆွဲနှုတ်ဆက်လိုက်လေသည်။

အိုး … လက်ကလေးတွေက နုလိုက်တာ …
ရိုက်တော့မလား … အိုကေလေ စကြတာပေါ့ …

အိုး … သာအေးတစ်ယောက် မျက်နှာဘယ်နား သွားဖွက်ထားရမှန်း မသိ။ ထိုအနှီ ကောင်မလေး နှစ်ယာက်က သူတို့ရှေ့တွင်ပင် ရေကူးဝတ်စုံကလေးများနှင့် ခုန်ပေါက်နေသည် … ဂလု …

ဟိုအကောင်တွေလည်း ဘာတွေလုပ်လို့ လုပ်နေမှန်းမသိ … သုံးချောင်း ထောက်ဒေါက်များ ထောက်ကြသည်။ ဟိုဟာ ထုတ်တပ်လိုက် ဒီဟာဖြုတ်လိုက်နှင့် ရှုပ်နေတာပဲ။ သူတို့ကို ကြည့်ရတာ စစ်သွားတိုက်မယ့် စစ်သားတွေ သေနတ်ပြောင်းတွေ တပ်လိုက်ဖြုတ်လိုက် လုပ်နေကြသလိုလို။

ဟင် … ကိုသာအေးကြီးက မရိုက်ဘူးလား … အဲ … အဲ … မေးနေပြီဟ … သြော် ကိုသာအေးက ဓာတ်ပုံဝါသနာမပါဘူးဗျ … ကျွန်တော်တို့ နှစ်ယောက်တည်း ရိုက်မှာ … သူက အဖော်လိုက်လာတာ …

ခွေးကောင်လေးတွေ … ငါ ဓာတ်ပုံဝါသနာမပါဘူးလို့ ဘယ်သူက ပြောလဲ … စိတ်ထဲမှာ ကျိတ်ဆဲပြီးမှ သာအေးတစ်ယောက် အသာအယာ ပြုံးပြရင်း ခေါင်းညိတ်ပြလိုက်သည်။ မဖြစ်တော့ဘူး မဖြစ်တော့ဘူး … ငါ ဓာတ်ပုံရိုက်မှ ဖြစ်တော့မယ်။

သာအေးတစ်ယောက် ခေါင်းတွေလည်း နောက်ကျိလာသည်။ ကမ်းခြေမှာ သူတစ်ယောက်တည်း အထီးကျန်ဆန်နေသလိုလို။ ဒီလိုနဲ့ သူတို့တွေ ဓာတ်ပုံရိုက်လို့သာ ပြီးသွားသည် သာအေးတစ်ယောက် စိတ်သိပ်မကြည်။ စိတ်မကြည်တော့ ရုပ်ကလည်း မရွှင်။

ကိုသာအေးကြီး နေမကောင်းဘူးလားဗျာ … မျက်နှာလည်း မလန်းပါလား … လန်းမလားဟဲ့၊ ခွေးကောင်လေးတွေရဲ့ နင်တို့ချည်းလန်းနေတာ ငါမှ မလန်းရတာ … အင်း … ခေါင်းနည်းနည်းကိုက်လို့ပါကွာ ဟူ ဖြေပြောလေး ပြောလိုက်ရလေသည်။ ဟားဟား … ကိုသာအေးကြီး ကျွန်တော်တို့ပုံတွေ အင်တာနက်ထဲတွေ့မှ လန်းထွက်သွားမယ် … ။

ပြောလည်း ပြောလောက်ပေသည်။ သကောင့်သားတွေ ဘယ့်နှယ့် လက်စွမ်းပြသည်မသိ။ ပုံတွေက အတော့်ကို လှလေသည်။ သာအေးတစ်ယောက် ဓာတ်ပုံရိုက်ချင်စိတ်များ ထိန်းမနိုင် သိမ်းမရ။ ဒီကောင်လေးတွေ ဆရာသွားတင်လို့ ငါ့ကို လှောင်နေဦးမယ်။ နေနှင့်ဦး … ။

သာအေးတစ်ယောက် ရှော့ပင် အကြီးအကျယ်ထွက်ရန် ပြင်ဆင်လိုက်သည်။ ကင်မရာတွေကလည်း မျိုးစုံလှသည်။ တံဆိပ်မျိုးစုံ မှန်ဘီလူးပေါင်းမျိုးစုံ … ဘယ်ဟာကို ရွေးလို့ ရွေးရမှန်း မသိ။ အို ရှုပ်ပါတယ်။ အားလုံးပါးစပ်ပိတ်သွားအောင် သာအေးလုပ်ပြမယ်။

သာအေး၏ ကားနောက်ခန်းတွင် ကင်မရာ နှစ်လုံးနှင့် မှန်ဘီလူးပေါင်း နှစ်ဒါဇင်တိတိပါလာသည်။ နီကွန်က ကောင်းတယ် ကင်နွန်ကကောင်းတယ်နှင့် ပြောနေကြတာ သူလည်း နားမလည်။ အဲလောက်တောင်ဖြစ်လှတာဆိုပြီး နီကွန်ကော ကင်နွန်ပါ ၀ယ်ချလာသည်။ ဒါတောင် အိုလံပတ်စ် ဆိုနီစသည့်ဟာများကလည်း သူ့ကို မျက်စပစ်ပြကြသည်။ သူ့မှာ လက်နှစ်ဖက်သာ ရှိသည်မို့ နှစ်လုံးဆိုတော်လောက်ပြီဆိုပြီး နှစ်လုံးသာ ရွေးယူလာခြင်းဖြစ်သည်။

သိပ်များများစားစား ရွေးစရာလည်းမလိုဘူးလေ။ ဟေ့ … မင်းတို့ဆီမှာ ဈေးအကြီးဆုံးဟာ ပေးဟေ့ဆိုလျှင် ကိစ္စပြတ်သည်။ မှန်ဘီလူး နှစ်ဒါဇင်လား။ ဒါကတော့ နီကွန်အတွက် တစ်ဒါဇင်။ ကင်နွန်အတွက် တစ်ဒါဇင်။ ဒါလည်း ဈေးအကြီးဆုံးတွေချည်း ရွေးယူလာတာဖြစ်သည်။ သူဘာမှ မသိ။ ထိုသူများပြောသော ကင်မရာအသုံးပြုနည်း သင်တန်းတက်လိုက်လျှင် သိမည်ဟု ယူဆရသည်။

ထိုသို့ဖြင့် ထိုသို့ဖြင့် ခြောက်လမျှ ကြာသွားသောအခါ … ကိုသာအေးကြီး ဘယ်လိုများ လေ့လာလိုက်သည် မသိ။ ဓာတ်ပုံပညာကို တစ်ဖက်ကမ်းခတ်မျှ (မှတ်ချက်။ နည်းနည်းတော့ အပိုပြောခြင်းဖြစ်သည် … အမှန်မှာ ခလုတ်နှိပ်တတ်ရုံလောက် တတ်သွားသည် … စာရေးသူ) ကျွမ်းကျင်လာသည်။ သူ့လက်ထဲတွင် ကင်မရာက နှစ်လုံးမကတော့ … ကင်နွန်၊ နီကွန်၊ အိုလံပတ်စ်၊ ဆိုနီ၊ ပန်တက်၊ မာမီယာ၊ စသည်ဖြင့် ကင်မရာခြောက်လုံး ရှိလာသည်။ သူ့ ဘဏ်စာရင်းထဲက ၀.၀၀၀၁ ရာခိုင်နှုန်းမျှသော ငွေပမာဏကို သူဖြုန်းပစ်လိုက်သည်။

ကိုသာအေးကြီး ဘယ်တော့ရိုက်ပေးမှာလည်း ဟူသော မေးခွန်းများ သူ့ထံတွင် ပုံနေသည်။ ဒါကြောင့် … သာအေးတစ်ယောက် နောက်ထပ်ကင်မရာ ဆယ်လုံးတိတိ ထပ်ဝယ်လိုက်သည်။ သာအေး ဓာတ်ပုံရိုက်ပြမည်။ မေးခွန်းတွေ အကုန်ဖြေပြီးသားဖြစ်အောင် သာအေးဓာတ်ပုံရိုက်ပြမည်။

ကမ်းခြေမှာ ဓာတ်ပုံအရိုက်ခံမည့် ကောင်မလေး ဆယ့်ခြောက်ယောက် တိတိရှိသည်။ သာအေး၏ ကင်မရာ ဆယ့်ခြောက်လုံးမှာ သုံးချောင်းထောက် ဒေါက်များပေါ်မှာ … သာအေးလက်ထဲမှာ အထူးစီမံပြုလုပ်ထားသော အဝေးထိန်းခလုတ်တစ်ခုရှိသည်။ ကင်မရာထုတ်ကုမ္ပဏီများမှ သာအေးအတွက် အထူးစီမံပေးထားခြင်းဖြစ်သည်။ ထိုအဝေးထိန်းခလုတ်နာမည်ကိုက TA 2009 တဲ့ … တီအေဆိုတော့ သာအေးပေါ့လေ။

ထိုကောင်မလေးများက ပုံစံမျိုးစုံအိုက်တင်ထုတ်ပြကြသည်။ သာအေးက အဝေးထိန်းခလုတ်မှ ခလုတ်မျိုးစုံကို နှိပ်သည်။ သူ၏ ကင်မရာများမှာ ခေသူများ မဟုတ်ကြ။ တစ်စက္ကန့်လျှင် ပုံခြောက်ဆယ်တိတိ ရိုက်ကူးနိုင်ကြသည်။ သူသုံးသော မှန်ဘီလူးများမှာ အကောင်းဆုံး အမူအယာကို ရသည်နှင့် အလိုလိုပုံရိပ်ကို ဖမ်းပေးကြသည်။

ထိုသို့ဖြင့် ခေတ်မီသူတိုင်း ဓာတ်ပုံရိုက်ကြသည့် ခေတ်တွင် ဓာတ်ပုံသာအေးဟူသော အမည်နာမမှာ ဟိုးလေးတကြော်ကြော်။ ဆုပေါင်း သောင်းခြောက်ထောင် အလကားနေရင်း အလကား လာလာပေးနေကြသည်။ သာအေးတစ်ယောက် တ၀ုန်းဝုန်း တရုံးရုံးနှင့် … ။

ကင်မရာကုမ္ပဏီကြီးများက အချဉ်သာအေးကို နည်းပညာများနှင့် ဖမ်းစားကြသည်။ မော်ဒယ်မလေးများက ကိုကိုသာအေး မောင်မောင်သာအေးကို အပြုံးကလေးများဖြင့် ဖမ်းစားကြသည်။ တစ်နေ့သော် …

သာအေးတစ်ယောက် သူ၏ လက်ကိုင်ဖုန်းမှ ခလုတ်ကလေးတစ်ခုကို မတော်တဆနှိပ်မိသည်။ အောင်မလေးဗျ … သာအေးလန့်သွားသည်။ သူ့ဖုန်းကလေး၏ စခရင်တွင် မှောင်မှောင်မည်းမည်း လှုပ်တုပ်လှုပ်တုပ်နဲ့ … သူ သေချာထပ်ကြည့်လိုက်သည် … သြော် .. လတ်စသတ်တော့ ဒါကလည်း ကင်မရာကိုး … ဟားဟား … ဟား ဟား … ဟား … ဟား … ဟား ဟား … ။ အဲလို တဟားဟား အော်ရယ်ရင်း သာအေးတစ်ယောက် သူ၏ ကင်မရာများနှင့် ပစ္စည်းများအားလုံးကို ကားပေါ်တင်ကာ ကားကို အပြင်းအထန်မောင်းထွက်သွားလေသည် … ။ ထိုအချိန်မှ စ၍ သာအေးကို မည်သူမှ မတွေ့ရတော့။ သာအေး တစ်ယောက် ပျောက်ချင်းမလှပျောက်သွားခဲ့ပြီ။

လူတစ်ချို့က ပြောကြသည် … ။

မော်ဒယ်မလေးများထဲမှ တစ်ယောက် ဒါမှမဟုတ် နှစ်ယောက်လည်း ပျောက်ဆုံးသွားကြသည်။

သာအေး၏ စည်းစိမ်ချမ်းသာများလည်း သာအေးနှင့်အတူ ပျောက်ဆုံးသွားသည်။

သာအေး၏ အတိုင်ပင်ခံရှေ့နေ ဦးအေးသာတစ်ယောက် အကြီးအကျယ်ချမ်းသာသွားသည်။

တောကြိုအုံကြားမှာ ကင်မရာတကားကားနှင့်
ဘုရားကြိုဘုရားကြားမှာ ကင်မရာတကားကားနှင့်
ရပ်ကွက်ကြိုရပ်ကွက်ကြားမှာ ကင်မရာတကားကားနှင့်
ကမ်းခြေတွေမှာ ကင်မရာတကားကားနှင့်
ပွဲတော်တွေမှာ ကင်မရာတကားကားနှင့်
ထိုထိုအီအီလမ်းသလားကြသော သူများအကြားတွင် ကိုသာအေးတစ်ယောက်များ ပါခဲ့ပါလျှင် …
မိတ်ဆွေများမှတ်မိကြပေဦးမည် …

ကိုသာအေး ထွက်ခွာသွားပြီးသော်လည်း ကိုသာအေး၏ အိမ်ကြီးထဲမှ ဧည့်ခန်းလေးအတွင်းရှိ စားပွဲပေါ်တွင်ကား ကိုသာအေး ထားရစ်ခဲ့သော တယ်လီဖုန်းလေးမှာမူ တတီတီမြည်ရင်း … ။

ကိုဖြိုး


(သံလွင်အိပ်မက်)

Thursday, May 31, 2007

အိပ်မက်ထဲမှာ

“ ဘာပြောတယ်လော်ရာ ! ”

“ စိတ်မဝင်စားဘူးလို့ပြောတာပါ ဒယ်ဒီ”

“ မရဘူးသမီး။ ဒီခေတ်ကြီးမှာ မင်းဗမာစာ၊ ဗမာစကားမတတ်လို့မရဘူး”

“ ဒါဆိုလည်း နောက်မှတတ်မယ် ဒယ်ဒီ။ အခုသမီးမှာ အင်္ဂလိပ်စာသင်တန်းနဲ့ ဂျပန်ယဉ်ကျေးမှုအတန်းတွေ တတ်ရဦးမယ်”

“ အဲဒါခက်တာပဲ။ ဘာကအရေးကြီးလဲဆိုတာ မင်းတို့ကလေးတွေ မခွဲနိုင်ဘူး။ ဗမာစကားတတ်ရင် ကမ္ဘာမှာ မင်းသွားချင်တဲ့ဆီသွားလို့ရပြီ၊ မင်းလုပ်ချင်တဲ့အလုပ် လုပ်လို့ရပြီကွ ”

“ အင်္ဂလိပ်စာထက်ပဲ အသုံးဝင်ဦးမလား ဒယ်ဒီရာ ”

“ ဝင်ပြီလား သမီး။ ကဲ… မင်းဗမာစာ၊ ဗမာစကားတတ်ပြီ ဆိုပါတော့။ ပထမဆုံး မင်းရန်ကုန်က မာစတာတန်းတွေ တက်ခွင့်ရမယ်။ မင်းဘူးဦးသြဘာသရဲ့ စာကောင်းစာခန့်တွေ ဖတ်လို့ရမယ်… ပြီးတော့ … ”

“ ရှိတ်စပီးယားထက်ပဲ ကောင်းဦးမလား။ ဒါထက် ဂျာမန်လူမျိုး အဖေက ဒီလိုပြောတာကို အံ့သြမိပါရဲ့။”

“ ဘာကွ … အေး … ၂၀၀၀ ပြည့်နှစ်လောက်ကဆို ငါပြောတာမှားချင်မှားမယ်။ အခုလိုအချိန်မှာတော့ မင်းဗမာစာမတတ်ရင် ဘာဖြစ်မယ်ထင်လဲ ”

“ သိပ်တော့မထူးပါဘူး ”

“ ဟာ… သိပ်ထူးတာပေါ့ သမီးရယ်။ ကဲ … ဒယ်ဒီပြောမယ် … နားထောင်။ ဗမာစာ မတတ်ရင် နောက်နှစ်ဆန်းမှာ ထွက်လာမယ့် Microsoft ရဲ့ Window Popa (ဝင်းဒိုးပုပ္ပါး) ကို မင်းဘယ်လိုသုံးမလဲ။ ထားပါတော့ မင်းက Open Source လို့။ Linux ရဲ့ “ ဟင်္သာရောင် အပိုင်း (၆) ” (Hintha Shine Core 6)ကိုရော ဘယ်လိုကိုင်တွယ်မလဲ။ အလုပ်လုပ်လို့မကောင်းတော့တဲ့ Window Vista နဲ့ နေခဲ့ချင်ရင်တော့ မင်း အမေရိက ကိုသွား။ ခေတ်ရှေ့ပြေးနေတဲ့ အရှေ့တောင်အာရှကို တော့ မလာလေနဲ့။ နောက်ပြီး Cell Phone နဲ့ မြေပုံစနစ် တွေမှာဆိုရင် မင်းဗမာစာမတတ်တာနဲ့ သုံးရခက်ပြီ ”

“ ဘာဆိုင်လဲ ဒယ်ဒီရာ ”

“ ဆိုင်တာပေါ့ … On Touch Screen နဲ့ Voice Command တွေသုံးထားတဲ့ (ဆသရ) အမျိုးအစားဖုံးတွေကို မင်းဘယ်လို အသုံးချမလဲ။ မြေပုံက စာတန်းတွေကလည်း ဗမာလိုလေ ”

“ Sony နဲ့ Nokia ကတော့ အင်္ဂလိပ်လို သုံးပါသေးတယ် ”

“ ဒယ်ဒီသိပြီ။ ငါ့သမီးက ဝိဇ္ဇာတန်းတက်ပြီး ခေတ်နဲ့မျက်ခြေပျက်နေတာကို။ မင်းပြောတဲ့ တံဆိပ်တွေက နည်းပညာပိုင်းမှာ ဆသရ ကိုမမှီတော့ဘူးကွ။ စစ်ကိုင်းမှာ လုပ်သွားတဲ့ ဆသရ အရောင်းမြှင့်တင်ရေးပွဲကို MRTV ၂၃ က တိုက်ရိုက်လွှင့်လို့ ဖေဖေကြည့်လိုက်ရတယ်။ သိပ်ကိုကောင်းတဲ့ လက်ကိုင်ဖုံးတွေပဲ သမီး။ Nokia ဆိုတာ ကလေးကစားတာပါကွာ။ ကဲ … ဒီတော့ သမီး ဗမာစာ သင်တန်းသွားတက်။ ပြီးရင် နောက်လထဲ ဒယ်ဒီ ဗမာပြည်သွားရင်လိုက်ခဲ့တော့။ ဟုတ်ပြီလား ”

“ ဗမာပြည်ဝင်ခွင့် ဗီဇာက ထင်သလောက်မလွယ်ဘူးနော်။ နောက်ပြီး ဒယ်ဒီက ဘာသွားလုပ်မှာလဲ”

“ ဒယ်ဒီက တောင်ငူမှာလုပ်မယ့် လေယာဉ်ပြပွဲကို သွားမယ်။ ဗမာပြည်လုပ် “မိုးယံဆင်” ငါးထပ်လူစီးလေယာဉ်ကို အဓိကကြည့်ချင်လို့ပါ။ အဲဒီလေယာဉ်က ပြေးလမ်းမလိုဘူး၊ ပြီးတော့ အတောင်ပံတွေကိုလည်း ခေါက်သိမ်းနိုင်သတဲ့။ သမီးပါရင်တော့ ရန်ကုန် မြကျွန်းသာပန်းခြံထဲက ရေအောက်ပြခန်းမှာလုပ်မယ့် စက်ရုပ်အလေးမပြိုင်ပွဲပါ ဝင်ကြည့်မလားလို့လေ”

“စိတ်ဝင်စားဖို့တော့ ကောင်းသားပဲ။ ဒါနဲ့အစားအသောက်က အဆင်ပြေပါ့မလား ဒယ်ဒီ”

“ဟားး ဟားးးး … ငါ့သမီးလဲ သူ့အမေနဲ့တူလာပြီ။ ကြံဖန်ပူတတ်လာတယ်။ ဒီမှာသမီး … ဗမာပြည်မှာ မရတာမရှိဘူး။ သမီးဘာစားချင်သလဲ။ အဆူးမပါ အနံ့ကင်းတဲ့ ၂၀၀၄ ခုနှစ်စတိုင် ဒူးရင်းသီးလား။ သယ်ယူရလွယ်ကူတဲ့ လေးထောင့်ပုံ ကြက်ဆင်ဥလား။ လေဆာနဲ့ အရိုးတွေကို ချေပြီး တကောင်လုံးဝါးလို့ရအောင်လုပ်ထားတဲ့ ငါးသလောက်ပေါင်းလား။ ဥရောပသားတွေ အတွက်သီးသန့်လုပ်ထားတဲ့ အဖြူရောင်ပုန်းရည်ကြီးလား။ ဒါမှမဟုတ် …”

“တော်ပါပြီ ဒယ်ဒီရယ်။ ဗိုက်တောင်ဆာလာပြီ။ သွားရေးလာရေးနဲ့ ဆက်သွယ်ရေးက…”

“သမီး … သမီးမေးခွန်းတွေက နည်းနည်းဘေးရောက်လာပြီ။ ဗမာပြည်သွားမယ်ဆို ဒါတွေကိုထည့်စဉ်းစားဖို့ကို မလိုဘူးလေ။ လေယာဉ်ပေါ်က ဆင်းတာနဲ့ အောက်ဆီဂျင်စစ်စစ်ထည့်ထားတဲ့ လေရှူဘူးတွေပေးမယ်။ နေရောင်ခြည်ကာတဲ့ ဦးထုပ်နဲ့ မျက်မှန်လည်းပေးမယ်။ ရာသီဥတုကြောင့်တော့ သမီးမပူရတော့ဘူး။ သမီးသွားမယ့် ဟိုတယ်တိုင်းမှာ သမီးစီးလာတဲ့ကားတံခါးကို လာကပ်မယ့် Tube တွေရှိတယ်။ အဲဒီအပေါ် ခြေထောက်ချလိုက်ရုံနဲ့ အလိုအလျောက်ရွေ့လျားပြီး သမီးကို Reception ကို ပို့ပေးလိမ့်မယ်။ အဲဒီမှာ ဘာသာစကား အနည်းဆုံး ၅၉၀ လောက်ပြောတတ်တဲ့ ဟိုတယ်ဝန်ထမ်းတွေ စောင့်နေလိမ့်မယ်။ နောက်ဘာတဲ့… ဆက်သွယ်ရေးဟုတ်လား… ဗမာနယ်စပ်ကို လေယာဉ်ဖြတ်တာနဲ့ အင်တာနက်ကွန်နက်ရှင်ရပြီ။ GSM တွေသယ်လာရင် ပြောလို့ရပြီ။ အဲ… ကိုယ့်ဖုံးကို ယူလာဖို့မေ့လာရင်လည်း မပူပါနဲ့။ လေဆိပ်မှာ လက်ကမ်းစာစောင်ဝေသလို GSM တွေ လိုက်ဝေနေတဲ့ ချာတိတ်တွေ ရှိတယ်။ ကြိုက်တဲ့ SIM Card ရွေးယူ။ Hand Set ကတော့ ထုတ်ထားတာ ၂ ပတ်ကြာတဲ့ မော်ဒယ်ဆိုရင် အလကားယူလို့ရတယ်လေ။ အများစုကတော့ “ဆသရ” လို့ခေါ်တဲ့ ဆက်သွယ်ရေးတံဆိပ် တွေပေါ့လေ”

“အော်..ကောင်းလိုက်တာနော်။ ဒါနဲ့ အစိုးရနဲ့ နိုင်ငံရေးကရော…”

“အစိုးရ.. အစိုးရ … ဒီအစိုးရကတော့ကွာ … ဖေဖေပြောမယ် … ဒီလိုရှိတယ် …”

ထိုစဉ် … “ဆိုက်ကားအားလား ” ဟူသော ခရီးသည်အသံကြောင့် ကျွန်တော်လည်း လန့်နိုးသွားကာ ခရီးသည်ကို လိုရာသို့ တင်ဆောင်လိုက်ပို့လေတော့သတည်း။

မောင်ပွတ်

Posted by Mr.Pooh @ မောင်ပွတ် at 12:01 PM

Friday, March 16, 2007

လေဆိပ်ရောက်ဖို့ ၁၅ မိနစ်

လေဆိပ်ရောက်ဖို့ ၁၅ မိနစ်လောက် လိုဦးမည်။ သူကတော့ မပင်ပန်းသလိုပင်။ လေယာဉ်ပေါ်တွင်ပေးသော မုန့်လက်ကောက်ကို ထန်းလျက်ရည်နှင့် အားရပါးရတို့ကာ စားနေလေဧ။်။ ကျန်လက်တစ်ဖက်ကလည်း ဒိန်ချဉ်ဘူးကို မလွတ်တန်းကိုင်ထားသေးသည်။ “သူ” ဆိုတာက ဇီဇူး ဟုချစ်စနိုးခေါ်ကြသော ကလေးပေါကြီး ဇီဒန်း ပင်ဖြစ်သည်။ ကျွန်တော်နှင့်သူသည် ဘရစ်တနီစပီးယားဧ။် သီလရှင်ဝတ်ပွဲကျင်းပရာ တောင်အာဖရိကနိုင်ငံ ကိပ်တောင်းမြို့မှ တဆင့် ဒိန်းမတ်သို့လာကြခြင်းဖြစ်သည်။ ဇီဒန်းကတော့ တကယ့်ကို အေးအေးဆေးဆေး။ မာတာရာဇီကို ခေါင်းနှင့်ဝင်ဆောင့်သည့်အကြောင်း မမောမပန်း ထပ်ပြောနေပြန်သည်။ ကျွန်တော်ကသာ ကိုယ့်အပူနှစ်ခုနှင့်ကိုယ်။ တခြားမဟုတ်။ တစ်ခုက ကျွန်တော့် Laptop အိတ်ထဲတွင် ကိုရီးယား ကင်း(မ်)ချီ တစ်ထုပ်ပါလာသည်။ အဲဒီက အရည်တွေကြောင့် Laptop ပျက်စီးသွားမှာစိုးရသည်။ ကျွန်တော်က ကင်း(မ်)ချီတွေ သယ်မလာချင်။ ကိပ်တောင်းလေဆိပ်ရောက်မှ ဘေယောင်ဂျွမ်းက ဆိုက်ကားကြီးနှင့် ရောက်လာပြီး UN အတွင်းရေးမှူးချုပ် ကိုရီးယားသားကြီး ဘန်ကီမွန်းကို ပေးရန် လူကြုံလာပေးသဖြင့် နီးရာအိတ်ထဲထည့်ပြီး သယ်လာခြင်းဖြစ်သည်။ ဘန်ကီမွန်းနှင့် သန်ဘက်ခါတွင် Liverpool တွင်ကျင်းပမည့် ၀င်းသူဇာဆိုင်ခွဲ(၈၃၇၂) ဖွင့်ပွဲတွင်တွေ့ရင်ပေးရမည်။ မတွေ့ပါက UN ရုံးချုပ်ရှိရာ တောင်ကြီးသို့ စာတိုက်ကပင် ပို့ရတော့မည်။ သူလိုလူအတွက်တော့ အချိန်သိပ်မပေးနိုင်တော့။ ဒါကပထမအပူဖြစ်သည်။

ဒုတိယအပူက တော့နည်းနည်းပိုဆိုးသည်။ ယခု ဇီဒန်းနှင့် ဒိန်းမတ်ကိုလာခြင်းမှာ မဲနှိုက်ပေးဖို့နှင့် လက်ဆောင်ပေးဖို့ဖြစ်သည်။ ရှင်းပြပါဦးမည်။ ယခုနှစ် World Football Club Champion Tournament Classic Cup 2007 ဗိုလ်လုပွဲတွင် မြန်မာပြည်မှ ပို့ဆောင်ရေးအသင်းနှင့် စပိန်မှ Real တို့ဆုံကြသည်။ နှစ်သင်းလုံးက အဖြူဝမ်းဆက်ဝတ်ကြသည်။ အစကတော့ Real က သူတို့အသင်းမှာ အသင်းသစ်၊ အသင်းငယ်ဖြစ်သဖြင့် သူတို့ပင် အရောင်ပြောင်းဝတ်မည်ဟုဆိုသည်။ အခုတော့တစ်မျိုး။ ဗိုလ်လုပွဲသို့နောက်တစ်ခေါက် ရောက်ရန်မသေချာသဖြင့် နှစ်တိုင်းနီးပါး ဗိုလ်စွဲနေသော မြန်မာကလပ်အသင်းက အရောင်ပြောင်းပေးပါရန် စပိန်ဘုရင် ကိုယ်တော်တိုင် Email ပို့လာသည်။ မြန်မာကလပ်က ပြောင်းပေးချင်သော်လည်း ပရိတ်သတ်ကို အဖြူရောင်ဂျာစီတွေ ရောင်းထားပြီးနှင့်ပြီ။ ထိုကိစ္စကို မဲနှိုက်ဖြေရှင်းရန် ကျွန်တော်နှင့်ဇီဇူးတို့ လာကြခြင်းဖြစ်သည်။ ပို့ဆောင်ရေးအသင်းနည်းပြ ဦးမောင်မောင်ဦး နှင့် Real နည်းပြလေး ကာပယ်လိုတို့မှာ ရောက်နှင့်နေလောက်ပြီ။ ဒါက မဲနှိုက်ဖို့။ လက်ဆောင်ပေးဖို့ကတော့ ဒိန်းမတ်ဘုရင်ဧ။် သားတော်ငယ် Dahl Houson အတွက် တကူးတကသယ်လာသော Shan Star Jeep တစ်စီးပင်ဖြစ်သည်။ ကျွန်တော်သယ်လာသော ကားမှာ ကားမြို့တော်ဟုခေါ်တွင်သော ဟားခါးမြို့တွင်ပင် ဈေးကွက်မတင်သေး။ ၂၀၀၈ မော်ဒယ်လ် ဖြစ်သည်။ Piston ၁၆ လုံးက W ပုံစံခုတ်သည်။ (W16 ဟုရေးထားသည်) အင်ဂျင်က ဂျက်အင်ဂျင်အသေးစားဖြစ်ပြီး ပလက်တီနမ်ဖြင့် သွန်းထားသည်။ လောင်စာမှာ လေဖြစ်ပြီး လေရှိသောမည့်သည့်နေရာတွင်မဆို တစ်နာရီ ၁၂၄၄ မိုင်အထိမောင်းနှင်နိုင်သည်။ လေမရနိုင်သော နေရာဖြစ်ပါက အနည်လုံးဝမပါသော ရေထည့်ပြီး တစ်နာရီ ၁၁၄၇မိုင်အထိမောင်းနိုင်သည်။ ၉ ချက်ထိုးဂီယာက ရွှေဖြင့်ပြီးသည်။ မီးကြီးတစ်ဖက် ၈ လုံးပါပြီး မီးစာမှာ စိန်ဖြစ်သည်။ တံခါးကတော့ Jeep ထုံးစံအတိုင်းဖြစ်သည်။ ကားစက်နှိုးခြင်း၊ Air Con ဖွင့်ခြင်း၊ မှန်အတင်အချလုပ်ခြင်း၊ ဂီယာပြောင်းခြင်း၊ နောက်မှန်ချိန်ခြင်း နှင့် Audio-Video Function များကို အသံဖြင့် အမိန့်ပေးခိုင်းစေနိုင်သည်။ ကားမှာ သော့တံများမလိုဘဲ လက်ဗွေရာနှင့် ဖွင့်ရသည်။ ဘီးလဲလှယ်လိုလျှင် Remote Control ဖြင့်ခိုင်းစေနိုင်သော်လည်း Demo Version သာဖြစ်သည်။ 20 LD Changer ဖြင့် Speaker 88 လုံး၊ Woofer 23 လုံးတွဲဖက်ထားပြီး ၁၂ လက်မ Slim LCD TV ပါဝင်သည်။ ကားရပ်နားထားစဉ် Video ကြည့်လိုပါက အရှေ့ Bullet Proof လေကာမှန်ကြီးကို TV အဖြစ်ပြောင်းသုံးနိုင်သည်။ ဆေးရောင်မှာ မှုတ်ထားခြင်းမဟုတ်ဘဲ သံအရည်ကြိုစဉ်ကတည်းက အရောင်ထွက်အောင်စီမံပေးထားသည်။ အထူးသဖြင့် ၂၀၁၀ တွင်ထုတ်လုပ်မည့် ပျံတက်နိုင်သော Shan Star Jeep အစအဖြစ် အတောင်ပံများတပ်ဆင်ရန် နေရာများပါပြီးဖြစ်သည်။ ခြုံပြောရလျှင် ထော်လာဂျီပေါ် ထောင်ကားဆင့်ထားသလို ရုပ်ထွက်ကောင်းသည်။ ကာလပေါက်ဈေး ကျပ်သုံးသောင်း (US$ 12Millions) လောက်ရှိသည်။ တကယ်တော့ ကျွန်တော်သယ်ယူလာသောကားမှာ ထိုသို့ကောင်းမွန်ပြည့်စုံသောကားဧ။် နမူနာပုံစံ သံပတ်ပေးရသော ကားရုပ်လေးသာဖြစ်သည်။ ဘုရင့်သားတော်လေး ဆော့ကစားဖို့ဖြစ်သည်။ ဒါတွေက လာရင်းကိစ္စများဖြစ်သည်။

ကျွန်တော့်ဒုတိယအပူမှာ လေဆိပ်တွင်ကြုံတွေ့ရမည့် အခက်အခဲများဖြစ်သည်။ ဒိန်းမတ်သမ္မတနှင့် ပလာတီနီကိုတော့ အသေအချာမှာထားသည်။ လေဆိပ်တွင် ကော်ဇော်အနီခင်းမကြိုရန်နှင့် လုံခြုံရေးအပြည့်အ၀ ပေးထားရန်ဖြစ်သည်။ နောက်တစ်ခုက လေဆိပ်တွင် ချောတိုင်တက်ပွဲ နောက်ဆုံးနေ့ ကျင်းပရန်ရှိသည်ဟုလည်း သတင်းရထားပြန်သည်။ လူများလျှင် ကျွန်တော်မနေတတ်။ နိုင်ငံရပ်ခြားအရောက်နည်းလှသော ဇီဇူးကြောင့် အရှက်ရမှာကိုလည်း စိုးရိမ်နေရသည်။ သူကဟိတ်နှင့် ဟန်နှင့် မနေတတ်။ သူ့ကိုလှမ်းကြည့်လိုက်တော့ နှုတ်ခမ်းတွင်ပေနေသာ ထန်းလျက်ရည်များကို Neck Tie ဖြင့် အားရပါးရ သုတ်နေလေသည်။

လေဆိပ်ရောက်ဖို့၁၅မိနစ်လောက်လိုဦးမည်။

Mr Pooh

*ပုံနှိပ်ထုတ်ဝေခြင်းမပြုရ။

( ၂၀၀၆ - ၂၀၀၇ မြန်မာ ဘလော့တွေမှာ စာရေးကောင်းတဲ့ ဘလော့ဂါတွေ တော်တော်များများ ပေါ်ခဲ့ဖူးထဲ.. အဲဒီထဲက မှ တချို့လည်း ဆက်မရေးဖြစ်တော့ဘူး.. ဒီနေ့အထိ ၂၀၀၇ ကနေ ၂၀၁၀ အထိ ပုံမှန်ပိုစ့်ရေးတဲ့ မြန်မာဘလော့ကာ ဆိုတာ လက်ချိုးရေလို့ ရသွားပါပြီ... လျော့သွားတဲ့ ဘလော့ကာတွေနေရာမှ လူငယ် ဘလော့ကာ တော်တော် များများလည်း အစားထိုး ၀င်ရောက်လာပါတယ် စာရေးကောင်းတဲ့ လူငယ်တွေလည်း အများအပြားတွေ့ရပါတယ်.. ကျွန်တော့် ရည်ရွယ်ချက်က ဘလော့ခေတ်ဦးက စာဟောင်းစာကောင်းတွေ အလျဉ်းသင့်သလို ပြန်လည်ဖော်ပြမလားလို့ပါ.. ကျေးဇူးတင်ပါတယ်ခင်ဗျာ)