ကျွန်တော် မြို့သစ်ရပ်ကွက်လေး တစ်ခုမှာ ဆယ်စုနှစ်တစ်ခု တိုင်အောင် နေထိုင်ခဲ့ဖူးတယ်… လယ်ကွက် တွေပေါ်ကန်သင်းရိုးဖြို… လမ်းဖောက်ပြီးမြေကွက်ရိုက်တဲ့ မြို့သစ်တွေဆိုတော့… မိုးတွင်းဆိုဗွက်ထပြီး နွေဆို ကျွတ်ကျွတ်ဆူလို့ပေါ့… ဆင်းရဲသားထုံးစံအတိုင်း… ကျွန်တော်ကလည်း ဈေးသက်သက်သာသာနဲ့ နားအေးပါးအေး နေရတယ်ဆိုပြီး သဘောကျနေပါတယ်.. . သိပ်မကြာခင်ပါပဲ ကျွတ်စီကျွတ်စီနဲ့ မြိုသစ်ရပ်ကွက်လေးဆီ.. အခြေခံလူတန်းစားတွေ အလျင်အမြန်ရောက်ရှိလာပါတယ်… လေးငါးအိမ်တန်းနဲ့ ကျွန်တော်တို့ လမ်းကလေးဟာ သိပ်မကြာခင်ပါပဲ အိမ်ခြေသုံးဆယ်လောက် ဖြစ်သွားပါတယ် … အေးစက်ငြိမ့်ညောင်းနေတဲ့ ညနေစောင်းလေးထဲမှာ ကလေးတွေက ဗန်ဒါပင်အရိပ်အောက်မှာ ဆော့ကစားလို့.. အလုပ်ပြန်လာသူတချို့ နဲ့ အိမ်ထောင်ဦးစီးတွေ ပြူတစ်ပြူတစ်နဲ့ စောင့်မျှော်နေတတ်တဲ့ အိမ်ရှင်မတွေနဲ့ အသက်ဝင်နေတဲ့ လမ်းကလေးကို ငေးရင်း ကျွန်တော့်အတွေးထဲမှာ လူတစ်ယောက်ကို အမှတ်ရမိနေပါတယ်.။ ထိုသူကတော့ ကျွန်တော့် သုံးအိမ်ကျော်မှာ နေထိုင်သွားဖူးတဲ့ ကိုညိုအေးပါ..။
ကိုညိုအေးက ပုပု ၀၀ မည်းမည်းလုံးလုံးနဲ့ ပျော်ပျော်ရွှင်ရွှင်နေတတ်သူ တစ်ဦးပါ… သူကဖော်ရွေလွန်းပြီး.. တစ်ခါတစ်ရံမှာတော့ လူတစ်ဖက်သား စိတ်အနှောင့်အယှက်ဖြစ်အောင် ရောနှောရင်းနှီးတတ်လွန်းပါတယ်..။ ကျွန်တော်က စာအုပ်တွေနဲ့သာ အချိန်ပြည့် ပေါင်းသင်းဆက်ဆံနေတတ်သူမို့ လူမှုရေး ဆိုးဆိုးဝါးဝါး ညံ့ဖျင်းပါတယ်… ကိုညိုအေးလို လူမျိုးကိုလည်း စိတ်အနှောင့်အယှက်ပေးတတ်သူမို့ မြင်ပြင်းကပ်တတ်ပါတယ်. ကျွန်တော် အဲဒီလမ်းထဲ ပြောင်းမလာခင် ကိုညိုအေးတို့က ကြိုတင်ရောက်နှင့်ခဲ့သူပါ .. သူက ဇနီးနဲ့ သမီးတစ်ဦး ရှိပြီး အလုပ်သွားချိန်မဟုတ်ရင်တော့ သူ့အိမ်ရှေ့ရေကပြင်.. ဒါမှမဟုတ်လမ်းပေါ်မှာ အမြဲတစေတွေ့ရတတ်သူပါ လမ်းထဲ ၀င်လာတဲ့ ဘယ်သူမဆို သူမနှုတ်ဆက်လိုက်တဲ့သူ မရှိရအောင် သူက အကုန်လုံးနဲ့ ရင်းနှီးနေတတ်ပါတယ်…။
ဒီလိုနဲ့ အပူချိန် အဆမတန်မြင့်မားတဲ့ နွေတစ်ရက်မှာ ဖုန်တထောင်းထောင်း ညနေစောင်းထဲ ကျွန်တော့်ဆီပေါက်ချလာတယ် … `စာရေးဆရာကျွန်တော်လမ်းဘေး တစ်ဖက်တစ်ချက်မှာ ဗန်ဒါပင်တွေ စိုက်ချင်လို့… အဲဒါ စာရေးဆရာ အိမ်ရှေ့မှာလည်း တစ်ပင်စိုက်မယ်နော်´ … ကျွန်တော်ကို စိတ်အနှောင့်အယှက် ဖြစ်စေတတ်တဲ့ သူစကားတွေထဲမှာ အခု စိတ်ကူးလေးကိုတော့ ကျွန်တော်တစ်လေး တစ်စားဖြစ်ရပါတယ်… `ဟာ စိုက်ပေါ့ဗျာ ကိုညိုအေးရ သစ်ပင်စိုက်တာပဲ ကောင်းတဲ့အလုပ်ပေါ့… ကျွန်တော်က တော့ သစ်ပင်စိုက်တဲ့ အတတ်နဲ့ နည်းနည်းဝေးတယ်ဗျာ.. အဲဒါကြောင့် ခြံထဲမှာတောင် ဘာပင် စိုက်ရမှန်းမသိတာနဲ့ အုန်းသီးသုံးလုံး ခြံထောင့်ပစ်ထားတာ ပေါက်ချင်တဲ့အသီးပေါက်ဆိုပြီး…။ အိုကေ…။ အဲဒါဆို ကျွန်တော် ရုံးရှေ့က ဗန်ဒါသီးတွေ ကောက်ပြီး အိမ်မှာပျိုးပြီးစိုက်မယ်…။ ကျွန်တော်လည်း မေ့မေ့ပျောက်ပျောက်ပါပဲ… မိုးဦးပေါက်ကျတော့ ကိုညိုအေး ရုံအားတဲ့ရက်မှာ ခမောက်ကြီးဆောင်းပြီး.. အကျီဗလာ ပုဆိုးတိုတို ၀တ်ပြီး သူ့ဗန်ဒါပျိုးပင်တွေကို စိုက်နေတော့တာပါပဲ…။ တစ်မိုးကုန်တော့ ဗန်ဒါပင်လေးတွေ မြေကြီးအထက် တော်တော်လေး တက်လာပါတယ်..အပင်က အရွက်လေးတွေထွက်လာတယ် ရိုးတံသွယ်သွယ် အကိုင်းအခက်လေးနဲ့ မျက်စိပသာဒရမလား ကြည့်နေရင်း တစ်ဖက်လမ်းက ဆိတ်အုပ်က အားရပါးရတွယ်တော့တာပါပဲ… မြို့သစ်မှာ မိုးအသစ်တွေ မရွာခင် ဆိတ်အုပ်ရဲ့ ဒဏ်ကို ဗန်ဒါပင်လေးတွေ တော်တော်ခံလိုက်ရတယ်… အဲဒီအချိန်ကိုညိုအေးမှာ အလုပ်တစ်ခု ပိုလာပါတယ်ဆိတ်မောင်းရတဲ့ အလုပ်ပါ… ဖုန်တထောင်းထောင်းကြားမှာ ပြေးလွှားဆော့ကစားတဲ့ ကလေးတွေ ကြောင့်လည်း ကိုညိုအေး ဗန်ဒါပင်လေးတွေ သက်ဆိုးမရှည်ရှာပါဘူး… ဒီကြားထဲကမှအပင်တွေကို မထိခိုက်အောင် သူခမျာ ခြင်းကြားကြီးတွေကို အုပ်ကြိုးနဲ့တုပ် အလုပ်တွေရှုပ်နေခဲ့ပါသေးတယ်… ကျွန်တော်ကလည်း စိတ်ကောင်းတစ်ဝက်ရှိသူ ဖြစ်လို့ကျွန်တော် အိမ်ရှေ့ ဗန်ဒါပင်လေးတွေကို စိတ်လိုလက်ရ ရေမှန်မှန်ထွက်လောင်းတတ်ပေမယ့်… မလှမ်းမကမ်း ခြေရင်းနှစ်အိမ်က ဗန်ဒါပင်တွေကို ဒီအတိုင်းကြည့်နေတတ်ပါတယ်… ခြေရင်းအိမ်က မိန်းမတွေက စပ်စုလွန်းတာ ကျွန်တော်နဲ့ မဖြစ်… သူတို့ စာရေးဆရာဆို လုံးချင်းဝတ္ထု ဘယ်နှအုပ်ထွက်ဖူးလည်း အရင်မေးတတ်တာ … ဟာသတို့ ဂမ္ဘီရတို့ရေးပေါ့ဆရာ အဲဒါဆို နာမည်ကြီးမယ် အဲဒီလို စကားတွေပြောတတ်သူတွေ… ဆရာလုပ်ချင်လို့ စာရေးနေတာ ကိုယ်ပြန်ဆရာလာလုပ်တော့ ကျွဲမြီးကိုတိုရော… ကိုညိုအေးကတော့ သဘောထားကြီးရှာပါတယ် သူခမျာတစ်လမ်းလုံး သူစိုက်ပျိုးထားသမျှ ရုံးကပြန်လာတာနဲ့ ၀တ္တရားမပြတ် ရေလောင်းရှာပါတယ်…။
ဒီလိုနဲ့ နှစ်တွေကြာလာတယ်… ကိုညိုအေး ဘ၀ကတော့ သိပ်မသာယာရှာပါဘူး… သူပထမ အိမ်ထောင်နဲ့ ကွဲပြီး နောက်ထပ်မိန်းမတစ်ယောက်နဲ့ အိမ်ထောင် ထပ်ကျသွားတယ် .. သူ့ မိန်းမကြီးလည်း ကိုညိုအေး ထားခဲ့တဲ့ အိမ်ကိုရောင်းပြီး တခြားအရပ်ပြောင်းသွားတယ် လမ်းထဲမှာတော့ ကိုညိုအေး စိုက်ခဲ့တဲ့ ဗန်ဒါ ငါးပင်ပဲ မားမားစွင့်စွင့် ကျန်ခဲ့တော့တယ်… တစ်နွေပြီး တစ်နွေ… တစ်မိုးပြီးတစ်မိုး ကျွန်တော်လည်း ဗန်ဒါပင်တွေ အောက်မှာ လမ်းလျှောက်ရင်း ဆယ်စုနှစ်တခုစာ ကုန်သွားခဲ့တယ်.. တချို့ ဗန်ဒါပင်တွေအောက်မှာ ရေအိုစင်လေးတွေတည်လို့ တချို့ ဗန်ဒါပင်အောက်မှာ ခုံတန်းလျားလေးတွေ ထိုးလို့… နေ့လည်နေ့ခင်း မြို့သစ်ရပ်ကွက်တွေထဲ လည်ရောင်းတဲ့ ခေါင်းရွက်ဗြက်ထိုး ဈေးသည်တွေ တစ်ထောက်နားလို့ အမောဖြေ ရေသောက်လို့ ဗန်ဒါရိပ်အောက်မှာ ကလေးတွေ ကျောင်းလွှတ်ချိန်မှာ အားပါးတရဆော့လို့.. ကျွန်တော် မျက်ဝါးဝါးထင်ထင် မြင်နေရတဲ့ သစ်ပင်တွေရဲ့ အကျိုးကျေးဇူးကို တွေးတောမိရင်း ပေါတောတော ပုတုတု ကိုညိုအေးတစ်ယောက်.. သူစိုက်ခဲ့တဲ့ ဗန်ဒါပင်တွေလို သူ့ဘ၀အေးချမ်းသာယာပါစေ ဆန္ဒပြုမိရင်း…။
မိုးလှိုင်ည